• බිමට ජලය රැගෙන යාමත් කුඩයක් වැනි අව් වැසි ආවරණයක් රැගෙන යාමත් වැදගත්.

• ඔබගේ පාසටහන් පමණක් ඉතිරි කරන්න. ඔබ සමග ගෙනයන අන් සියල්ල ආපසු රැගෙන එන්න.

පිදුම, සංචාරයට රුචි ඔබ සැමට

මේ සංචාරයේ ඡායා රූප පෙළගැස්මක් (Slide show )ලබාගැනීම සඳහා කවර හෝ ඡායා රූපයක් මත කොටන්න.

මේ සංචාරයේ මුල් කොටස කියවීම සඳහා :
කටගමුව වනෝද්‍යානය ඔස්සේ සිතුල්පව්වට සෆාරියක්

රාත්‍රිය පුරාවටම ඇදහැලුන වැස්ස නිසා මුළු පරිසරයම ප්‍රබෝදමත් බවක් ඇතිකරගෙන තිබුණා. උදේ තේ පානය අතරතුරේදී, ජිවිතේ පළමු වතාවට පයගපු ලුණුගල නගරය අවට තියෙන වැදගත් සංචාරක ස්ථාන ගැන, හිතමින් උන්න මම පුංචි ලෝකාන්තය බලන්න යමුදැයි කරපු යෝජනාවට; නොහිතපු විදිහට හැමෝගෙම අනුමැතිය ලැබුණා. පස්සර තියෙන පුංචි ලෝකාන්තය ගැන මම බොහොම කාලයක ඉඳල දැනගෙන හිටියා වුනත් මේ සුවිශේෂී ස්ථානයට සංචාරයේ යෙදෙන්න මෙච්චර පහසුවෙන් ඉඩ සැලසේවි කියලා හීනෙකින්වත් හිතුවේ නැහැ. ඒ අනුව මේ ගමනට රසිකත් රසිකගේ අලුත ගෙනා මනමාලිත් එකතුවුනේ බොහොම සතුටින්.

ලුණුගල පොලිසිය ලගින් වැටුන පටු මාර්ගය එහි පළමු සැතපුම පසුකරන්නටත් කලියෙන් පටු කඳුකර මාර්ගයක් බවට පත්වුණා. ලොකු නැග්මක් සහිතව වංගු හරවමින් ඉහලට ඇදුන ජීප් රථයට මාර්ගය මෑතකදී කොන්ක්‍රීට් යොදා පිළිසකර කර තිබීම අස්වැසිල්ලක් වුවාට කිසිම සැකයක් නැහැ. කිලෝමීටර 5 ක පමණ දුරක සීග්‍ර නැග්මකින් පස්සේ කඳුවැටියේ කපොල්ලක් තුලින් අනෙක් බැවුමට මාරුවන්නට අපට සිදු වුණා. මේ කපොල්ල අද්දර පිහිටලා තිබුන තුන්මන් හන්දිය හැදින්වුනේ “ජනතාපුර” නමින්. සුවිසල් පයිනස් වනයකින් වටවුන, දිගු කඳුවැටියක් මත, සුළං කපොල්ලක් අභියස පිහිටි පුංචි කඩමණ්ඩිය සිනමා සිත්තමක දර්ශන තලයක් සිහියට නගනුලැබුවා.

මඟ තොට තොරතුරු විමසමින් ජනතාපුර මංසන්ධියේදී

කඳුවැටියේ බටහිර බෑවුම ඔස්සේ මාර්ග දෙකක් වැටී තිබුණා. එයින් එකක් පස්සර දක්වා දිවෙන්නක්වූ අතර අනෙක අප යායුතු වූ කොකාගල දෙසට දිවෙන්නක් වූවා. අවට දිස්වන මනස්කාන්ත දර්ශනය නරඹමින් සුළු විරාමයකට පස්සේ, අපේ ගමන නැවත අරඹනු ලැබුවා. චණ්ඩ හිරුරැස් විවුර්ත ජීප් රිය මත තදින් වැදුනත්; ගත වෙලාගත් වියලි මුත් සීත සුලන්රැළි සුවදායක බවක් ඇතිකරනු ලැබුවා.

කාබනික තේ වගාව

මාර්ග තොරතුරු පුවරු

පරිසරය එහෙම උනත් මාර්ගයේ තත්වයනම් එන්න එන්නම ධරුනු උනා. කොතෙක් රළු මගට ඔරොත්තුදෙන්නක් උනත් අපේ ජීප් රථයට සිද්ද උනේ ඉබිගමනින් ඉදිරියට ඇදෙන්නටයි. පැයක විතර ගමනකින් පස්සේ සම්පුරණ කාබනික වගාවනට වෙන්වුන කොකාගල තේ වත්තට ඒ නම ලබන්නට හේතුවුන කොකාගල දැකගන්න අපට හැකියාව ලැබුණා. කොකෙක් වගේ පෙනුනත් සමහරුනට මේක පෙනෙන්නේ අපේ පළමු අගමැති තුමාගේ මුහුණ වගේලු. ඒ නිසා මේක DS ගල කියලත් සමහරු හඳුන්වනවාලු. මේ බව අපට කිව්වේ වත්තේ ලයිමක වෙත පණිවිඩයක් ගෙනියමින් හිටපු ද්‍රවිඩ සහෝදරයෙකුයි.

අර කන්දේ ඉහලට නෙරා තියෙන ගලට තමයි කොකාගල කියන්නේ

තේ වත්තේ තැනින් තැන හදල තිබුණු ගිම්හානකුටි කොතරම් සුන්දර කිව්වොත් ඒවා කවර අරමුණක් වෙනුවෙන් නිමවා ඇතිද කියා අපතුල ඇතිවුයේ විචිකිච්චාවක්. ඇත්තටම ඒවා එතරම් ලස්සනයි. බොහෝවිට මේවා දළු එකතුකරන මධ්‍යස්ථාන වෙන්න ඇති. කාබනික තේ වගාවන් නිරන්තරයෙන් විදේශීය ගැනුම්කරුවන්ගේ අධීක්ෂණයට ලක්වන නිසා මේවා සුන්දර පරිසර හිතකාමී ඉදිකිරීම් ලෙසින් නිර්මාණය කලා වන්නට පුළුවන. ඒ කෙසේ වෙතත් මේවා ඔබ අප වැනි සංචාරකයන් පිනවන්නටනම් මහත්සේ හේතුවුන බවනම් නොකියම බැහැ.

සුන්දර ගිම්හානකුටි

කොකාගල ලෝකාන්ත දෙකක් තියෙනවා. එයින් මුලින්ම හමුවන ලෝකාන්තය තමයි කොකාගල (ප්‍රධාන) පුංචි ලෝකාන්තය විදිහට හදුන්වනු ලබන්නේ. මේකට ප්‍රධාන මාර්ගයෙන් මීටර් 300 ක් විතර ගමන්කරලා තවත් මීටර් 100 ක් විතර පාගමණකින් තමයි ළඟාවෙන්න තියෙන්නේ. ආසන්නයේ තියෙන ඵලකයේ ඇති විස්තර වලට අනුව මේක අඩි 1250 ක් ගැඹුරුයි.

ආසන්නයේ තියෙන ඵලකයේ ඇති විස්තර වලට අනුව

තවත් ගිම්හාන කුටියක්

මෙම කලාපයේ නැගෙනහිරට වන්නට පිහිට ඇති අවසන් කඳුවැටිය වීම නිසාම මෙම ස්ථානයේ සිට නැගෙනහිර වෙරල දක්වාම ඉතා සුන්දර දර්ශනයක් දැකගැනීමේ අවස්ථාව අපට ලැබුණා. තවද හෝර්ටන් තැන්නෙහි හෝ නකල්ස් කදුකරයේ පිහිටි ලෝකාන්ත මෙන් නොව මිහිදුමින් තොර පැහැදිලි දර්ශනයක් අත්විදීමේ අවස්ථාව මෙතනට පැමිණෙන සංචාරකයන්ට ලැබෙන බව විශේෂයෙන් මතක් කරන්න ඕන.

මේක අඩි 1250 ක් ගැඹුරුයි

ලෝකන්තයෙහි ඉම අද්දර සිමෙන්තියෙන් සකස් කරන ලද අර්ධ කවාකාර පුවරුව මත, මෙතනට පැමිණෙන සංචාරකයන්හට මගපෙන්වීම සදහා ඒ ඒ දිශා වලින් දර්ශනය වන වැදගත් ස්ථාන සටහන් කරලා තිබීම ඉතාම අගේකල යුත්තක්. ඒ වගේම සංචාරකයන්හට මේ පුවරුව මත දිගාවෙලා පහල ආගාධය දෙස ආරක්ෂාකාරීව බලන්නත් හැකියාව එයින් ලැබී තිබීම වැදගත්.

සිමෙන්තියෙන් සකස් කරන ලද අර්ධ කවාකාර පුවරුව

මේ පුවරුව මත දිගාවෙලා පහල ආගාධය දෙස ආරක්ෂාකාරීව බලන්නත් හැකියාව ලැබී තිබීම වැදගත්

මේ ස්ථානයේ හෝරාවකට වැඩි කාලයක් සුන්දරත්වය අත්වින්ද අප කොකාගල පිහිටි දෙවෙනි ලෝකාන්තය බලන්න පිටත් වුනා. මේ ස්ථානය පිහිටලා තිබුනේ අප මුලින් සිටි ස්ථානයට සැතපුම් භාගයක් පමණ දුරින් ඊට වඩා මදක් පහලින් වන්නටයි. ඒ සදහා නැවත ප්‍රදාන මාර්ගයට පැමිණ ටිකදුරක ඉදිරියට යන්න සිද්ද උනා. ගමේ උදවිය වඳින පුදන පුංචි දේවාලයක් අසලින් වැටුන පටු අඩිපාර දිගේ මදක් ඉහලට ගිය අපට තරමක විශාල කඳුමුන්දුනක් හමුවුණා. ලෝකාන්තය පිහිටලා තිබුනේ එහි නැගෙනහිර බෑවුමට වන්නටයි. සුන්දරත්වයෙන්නම් මෙම ස්ථාන දෙක අතරේ තිබ්බේ නොනිමි තරඟයක්. හැබැයි ගමේ උදවිය කිව්ව විදිහට මෙම ස්ථානය කුලුහරකුන් විමානයක්. කුළුහරක් නිතරම ප්‍රචණ්ඩකාරී හැසිරීම් සහිතයි. ඒ නිසා දුටුතැන මගහැරයාම ඉතාම වැදගත්. රැලකට අහුවුනොත්නම් ඉතින් දෙය්යන්ගේම පිහිට තමයි. හැබැයි වාසනාවකට ගව වසුරු හැරෙන්නට කුළුහරක් නම් අපේ දර්ශනයට ලක්වුණේ නැහැ. එහෙම උනානම් ඔයගොල්ලන්ට මේ සටහන කියවන්න වෙන්නේ නැහැ, මොකද අපි තවමත් දු-ව-න-වා එහෙනම්…..!

තවත් ගිම්හාන කුටියක්

පුංචි (පුංචි) ලෝකාන්තය වෙත

පුංචි (පුංචි) ලෝකාන්තය අසල ඉතා සුන්දර දර්ශනයක් දැකගැනීමේ අවස්ථාව අපට ලැබුණා

පුංචි (පුංචි) ලෝකාන්තය අසල ඉතා සුන්දර දර්ශනයක් දැකගැනීමේ අවස්ථාව අපට ලැබුණා

කටගමුව වනෝද්‍යානය ඔස්සේ සිතුල්පව්වට සෆාරියක්

මැණික් නිම්නය ඔස්සේ කෙටිම මඟකින්කතරගමට

ජය වේවා!