Thonigala Inscriptions (The Longest Inscriptions of Sri Lanka)

admin | Aug 15, 2011 | මෙම ලිපිය ගැන ඔබේ අදහස් 39

කතෘ : දිනේෂ් ඩෙකර්
කතෘ හා සම්බන්ද වන්න : dineshdsd@gmail.com

අවුරුද්ද & මාසය	දින ගණන	පුද්ගලයන්	කාලගුණය	ප්‍රවාහනය
අගෝස්තු 2010	1	5	අවුව ඇති	කාර් රථය

මාර්ගය
ගනේමුල්ල-> ජා ඇල -> පලාවි->ගනේමුල්ල-> ජා ඇල -> පලාවි->(පුත්තලම -කුරුණෑගල පාර)->කල්අඩි->තෝනිගල
නවාතැන
නැත

විශේෂ කරුණු හා මතක තබා ගත යුත් දේවල්
පරිසරය සුරකින්න පුරාවස්තු විනාශ කරන්න එපා පිදුම, ලංකාවේ ඉතිහාසයට ඇතුලත් නොවූ ඉතිහාසය සොයා ගැනීමට වෙහෙසන උගත් බුද්ධිමත් සැම වෙනුවෙන් ශ්‍රී ලංකාවේ සැඟවුණු අතීතය සොයා යන අපට වැදගත් වෙන තවත් තැනක් හොයාගෙන තමයි අපි අද යන්න හදන්නේ. ගිය සතියේ අපි කුවේණිගේ ඥාති සොහොයුරියක් වන අල්ලිරාණිගේ මාලිගාව බලන්න ගියා මතක ඇතිනේ. මහාවංශයට අනුව ලංකාවේ ඉතිහාසය පටන් ගන්නේ විජය රජතුමාගේ ඉඳලනෙ. නමුත් විජය රජතුමා ගැනත් බොහොම සීමිත වශයෙන් තමා මහානාම හිමි විසින් මහාවංශයේ ලියල තියෙන්නේ. අපිට තියෙන සාක්ෂි අනුව අපි ඉතිහාසය හොයාගෙන ඉදිරියට යමුකෝ. නොයෙක් පුද්ගලයෝ නොයෙක් මත පල කරලා තියෙනවා ඉතිහාසය ගැන නමුත් අපි දැන ගන්න ඕන ඒවා පරිශීලනය කරලා අපේ ශ්‍රේෂ්ට හෙළ ඉතිහාසය පියවරෙන් පියවර ගොඩ නගා ගන්න. අනික් එක ඉතිහාසය කියන්නේ ටෙලිනාට්‍යයක් නෙමෙයි අපිට ඕන විදිහට හදාගන්න. මොකද ඒවා ඇත්තටම සිද්දවෙච දේවල් නිසා. ( මේක කියපු වැදගත් පුද්ගලයත් මේ සංචාරක සටහන මේ වෙලාවේ කියවනවා ඇති) හරි, අපි ගමන යන්න ලෑස්ති වෙමුකෝ. ලෑස්තිද? එහෙමනම් යන්නේ කොහෙද කියල කියන්නම්කෝ. අපි අද යන තැන මහාවංශයට ඇතුලත් නොවුණු හෙළ ඉතිහාසයට වගේම මහාවංශයේ ඇතුලත් ඉතිහාසයටත් වැදගත් තැනක්. අපි අද යන්නේ කුවේණිය ලතෝනි දුන් ගල, ලතෝනිගල එහෙමත් නැත්නම් තෝනිගල හොයාගෙන. අමතක කරන්න එපා ලංකාවේ දිගම සෙල්ලිපිය තියෙන්නෙත් එහේ තමයි. අපි මේ ගමන යන අතරේ තවත් ඉතිහාසයට වගේම ලංකාවේ භූ විෂමතාවයටත් වැදගත් තැනක් බලන්න යනවා. අපි නම් යන්නේ කල්පිටියේ ඉඳන්. ඔයගොල්ලෝ කොළඹ ඉඳන් එන නිසා පෑලියගොඩ – පුත්තලම පාරේ ඒ කියන්නේ A3 පාරේ ඇවිල්ල පාලවී වලින් (පුත්තලම – කුරුණෑගල ) පාරට වැටෙන්න ඕන. එතන තියෙන තුන් මං හන්දියෙන් වම් අත පැත්තට කිලෝමීටර් 8 ක් විතර යනකොට හම්බෙනවා කල්ලඩි කියන ග්‍රාමයේ තියෙන විශේෂ පිළිමයක්. මොකක්ද අප්පේ ඒ…. ඒ තමයි ලංකාවේ මම දැකල තියන එකම කුවේණියගේ පිළිමය. මේක හදල තියෙන්නේ අපි ඇතුල්වෙලා තියෙන්නේ කුවේණියගේ රාජධානිය බව සිහිගන්වන්න. මේක හදල තියෙන්නේ පුත්තලම සිමෙන්ති කම්හලෙන්. අපේ ශ්‍රේෂ්ට ඉතිහාසයේ රැජිනක් වන කුවේණිය හට එවැනි උපහාරයක් දැක්වීම ගැන අපේ උත්තමාචාරය හිමිවෙන්න ඕන. එතන විනාඩි කිහිපයක් රැඳිලා අපේ ගමන පටන් ගමු. ඔයගොල්ලෝ දන්නවා ඇති මහඑලිය තැන්න මුහුදු මට්ටමේ ඉඳන් මීටර් 2200 ක් උස බව. මුහුදු මට්ටමේ ඉඳන් මීටර් 1 සම්මතය තියෙන්නේ කොහෙද? හිතල බලල තියනවද? අපි දැන් යන්නේ මිනින්දෝරු දෙපාර්තුමේන්තුව විසින් සවිකරලා තියන මීටර් එකේ මූලික මිනුම් දණ්ඩ බලන්න. කුවේණි පිළිමයේ ඉඳන් මීටර් 300 ක් විතර ගියාම වම් අත පැත්තේ දේවාලයක් හම්බවෙනවා. එතනින් බැහැල මීටර් 10 ක් ඉස්සරහට ගිහිල්ල වමට හැරෙන්න ඕනේ. එතන ඉඳන් තව මීටර් 50 ක් විතර ගියාම Fundamental Benchmark එක තියනවා. මේ විශේෂ ස්ථානය කම්බි වලින් වටකරලා තියනවා. ඒත් අපේ මිනිස්සුන්ගේ නොසන්ඩාල කම කියන්නේ ඒ කම්බි වල රෙදි වනල. අනේ මෙහෙමත් රටක්! අපි තෝනිගල බලන්න පිටත් වෙන්න වෙලාව හරි. ආපහු කාර් එක හරවාගෙන අපි කුරුණෑගල පැත්තට යන්න ඕන. පුත්තලම් – කුරුණෑගල පාරේ කිලෝමීටර් 104 – 105 අතරේ කොට්ටුකච්චි කියල ගමක් හම්බවෙනවා. මතක ඇතිව වම පැත්ත ගැන අවදානයෙන් යන්න එතකොට පුරවිද්‍යා බෝර්ඩ් එක දකින්න පුළුවන්. එතන බෝර්ඩ් එකේ මීටර් 300 යි කියල ගහල තියනවා. හැරෙමු මෙතනින්, තව මීටර් 300 ක් ගියාම වම් අත පැත්තේ බෝර්ඩ් එකක් දාල තියනවා මීටර් 150 යි කියල. මෙතනින් බැහැල ඇවිදගෙන යමුකෝ. ඉතිහාසේ ප්‍රෞඩත්වයත් එක්ක හරිම ගුප්ත හැඟීමකුත් දැනෙනවා ඉස්සරහට යද්දී. අපි පොඩ්ඩක් ඉතිහාසයේ ආපස්සට ගිහින් එමු.මහාවංශයේ සඳහන් වෙලා තියන විදිහට (ක්‍රි.පු. 5 වන සියවසේ දී) බුදු හිමියන් පිරිණිවන් පෑ දිනයේ තම්බපන්ණි වෙරළට විජය කුමරු සහ ඹහු‍ගේ 700 ක් පිරිස ගොඩබැස්ස බව සඳහන් වෙනවා. කුවේණියගේ සහයෙන් යක්‍ෂ රජ පවුල ඝාතනය කර ලංකාවේ රජු බවට පත් වෙලා කුවේනිය තම බිසව බවට පත්කර ගත්තා. විජය රජුට දාව දරුවන් දෙදෙනෙකු කුවේණි වැදුවා. ඔවුන් නමින් ජීවහත්ත හා දිසාලා. සෙනරත් පරණවිතාන මහතාගේ ගවේෂණ අනුව, ජීවහත්ත හා දිසාලා එකතුවී පුලියන්දන් (වැදී ජනයා / ආදිවාසීන්) ඇතිවුන කියල තියනවා. සෙනරත් පරණවිතාන මහතා බ්‍රිතාන්‍ය ජාතික කෝඩ්රින්ටන් මහතා 1912 දී ලියපු ඉතිහාසය පිළිගත් බවත් එම ඉතිහාසය ඔප්පු කිරීමට සෙල් ලිපි සෙවූ බවත් අපිට සිතෙනවා.(මොකද ඔහු සෙල් ලිපි කියවන්න ගත්තේ 1920 න් පස්සේ. ) බෝධිවංශයට අනුව කුවේනියට පුතෙක් පමණක් සිටි බව සඳහන් වෙනවා. ඔහු නමින් වීරබාහු කුමාරයා. ඔහු විසින් කුරුණෑගල දිස්ත්‍රිකයේ විල්බා ජනපදය පාලනය කල බවත් සඳහන්. ජීව + හත්ත කියන්නේ ප්‍රාණවත් අත කියන එක. වීර + බාහු කියන්නේ ශක්තිමත් අතක් ඇත්තා කියන එක. මේ නම් දෙකේ සමානත්වය නිසා බෝධිවංසය පිළිගන්න පුළුවන්. විජය රජතුමා කුවේණිව හා දරු දෙදෙනාව මාලිගයෙන් පන්නා දැමුණු බව සඳහන් වෙනවා.ඇයි පැන්නුවේ? විජය කුමරු ආර්යයන්ගෙන් පැවතගෙන එන නිසා රජෙක් වෙන්න නම් ආර්යය රජ කුමරියක් සරණ පවා ගන්න අත්‍ය අවශ්‍යය වුණා. ඊට පස්සේ ඉතිහාසයේ කියවෙන්නේ කුවේණියගේ රාජධානියේ තිබුණු මේ ගල්තලාවට පැමිණි කුවේණි විජය කුමරුට ශාප කර ලතෝනි දුන් බවයි. මේ හේතුව නිසා එම ගල ලතෝනි ගල වී පසුව කාලයාගේ ඇවෑමෙන් තෝනිගල වූ බව කියවෙනවා. ඉන් පසු කුවේණිය නෑදායින් හම්බෙන්න ගිය වෙලාවේ කුවේණිය මරා දැමුණු බව කියවෙනව . කුවේණිවයි දරුවන්වයි විජය එළවුවාට පස්සේ විජයගේ අමාත්‍යවරු තම නායකයාට සුදුසු බිරිඳක් සෙවීම ආරම්භ කලා. ඔවුනට එවැනි කාන්තාවක් හමු වුනේ දකුණු ඉන්දියාවේ මදුරෙයි නගරයේ පඬි රජුගේ දියණියයි. නමුත් විජයට ළමයි සිටියේ නැහැ. ඒක නිසා බුදුන්ගේ පරපුරෙන් පැවතෙන විජයගෙන් පස්සේ රජකමට පත්වුණේ උපතිස්ස ඇමති බව සඳහන්. එහෙනම් අපි කොහොමද අපි බුදුහාමුදුරුවන්ගේ ඥාති පරම්පරාවෙන් පැවතෙනවා කියන්නේ? ඒ මෙහෙමයි… උපතිස්ස රජුගෙන් පස්සේ රජවුණ පඬුවස්දෙවූ රජු අමිතෝදන ශාක්‍ය රජතුමන්ගේ මිනිපිරියක් වෙන භද්දකච්චනා කුමරිය සරණ පාවා ගැනීම හින්ද. හරි, එකෙන් කමක් නැහැ අපි බලමුකෝ මේ තෝනිගල මොන වගේද කියල. හැම පැත්තෙන්ම පෙනෙන්නේ ගිරි ශිකර. (පුදුමයි ගල් මෝල් හිමියන්ගෙන් පරිස්සම් වෙලා තියන ඒක) ඒ අතරේ ලස්සන විලක් තියනවා නෙලුම් මල් පිරුන. ගමේ ඇත්තෝ මෙය විලෙන් ගොඩක් වැඩ ගන්නවා. ආ.. මේ තියෙන්නේ සෙල් ලිපිය. ලංකාවේ කොතරම් සෙල් ලිපි තිබුනත් මේ සෙල් ලිපිය තමයි ලංකාවේ ලිගම සෙල්ලිපිය. වටේටම යකඩ කණු ගහල වට කරලා තියෙන්නේ. මේක ලියල තියෙන්නේ පූර්ව බ්‍රාහ්මීය අක්ෂරයෙන්. සෙල් ලිපියට ඉදිරියෙන් තියෙන මේ විල, අච්චනගරය හා තවිකිරිය ගාමිණී අභය රජතුමාගේ පුත් තිස්ස විසින් අච්චාගාරික තිස්ස පබ්බත විහාරය සඳහා පරිත්‍යාග කල බව සෙල්ලිපියෙන් කියවෙනවා. බලන්න මේ සියවසේ ආපු පාපතරයන් මේ සෙල් ලිපිය ගාව ලියල තියන දේවල්.. මේ මිනිස්සු ලක්ෂ ගණන් වියදම් කරගෙන රට යනව වැදගත් දේවල් මෙච්චර ලංකාවේ තියෙද්දී. හොඳම වැඩේ කියන්නේ ඒ රටවල ගිහින් සුද්දෝ වගේ හානියක් නොකර බලල එනවා. ඒත් අපේ ඒවා බලන්න ආවම කෙළසනවා.. අපි දෙවනි සෙල්ලිපිය බලන්න යමු. ඒක තියෙන්නේ මෙතන ඉඳන් මීටර් 200 ක් ඉස්සරහ. යමුකෝ ඉතින් එකත් බලන්න. ආ… අර තියෙන්නේ.. මේකත් ඉස්සෙල්ලා එක වගේම ගොඩක් ලොකුයි. ඒ විතරක් නෙමෙයි. අච්චාගාරික තිස්ස පබ්බත විහාරය කියල හඳුන්වපු පරමාකන්ද විහාරය මෙතන ඉඳන් බැලුවම පේනවා. ඉර බහින්නත් ලඟයි එක නිසා මෙතන ටිකක් ගිමන් හැරලා ආපහු යමු… මම අදට ඔයගොල්ලන්ගෙන් සමු ගන්නේ ඉදිරියේත් ලස්සන චාරිකා සටහනකින් හමුවීමේ බලාපොරොත්තුවෙන්. පහත දක්වා ඇති ප්‍රශ්න වලට උත්තර විටින් විට සංචාරක සටහන් මගින් ගෙන එන්න අපි බලාපොරොත්තු වෙනවා. ඒ විතරක් නෙමෙයි ඔයගොල්ලෝ ජීවිතේට හිතපු නැති දේවල් ගොන්නක් පෙළගස්වන්න හිතන් ඉන්නේ සංචාරක සටහන් මගින්. ඒක නිසා දිගටම අප සමග රැඳෙන්න. මොහෙන්ජොදාරෝ – හරප්පා ශිෂ්ටාචාරයට මොකද වුනේ? මහාවංශයේ 40 වැනි පරිච්චේදයට මොකද වුනේ? බැබිලෝනියාවේ එල්ලෙන මල් උයන හදන්න අදහස ගත්තේ කොහෙන්ද? ඇලෙක්සැන්ඩ්‍රියාවට පස්සේ ලෝකේ හොඳම සාගර විශ්වවිදයාල තිබ්බේ කොහෙද? මැඩගස්කර්, මාලදිවයින ලංකාව අතර සම්බන්ධය මොකක්ද? සෙල්ලිපි වල ලක්වාසීන් ගුවනින් ගමන් කල බව දක්වා තිබ්බද ? අපි උත්සහ කරන්නේ හෙළ දස්කම් ගල් කුලකට සීමා නොකර ගවේෂණයේ යෙදී පොත්පත් පරිශීලනය කර ඔයගොල්ලෝ දැනුවත් කිරීමයි. අපිට ලැබුණු ප්‍රතිචාර වලින් අපේ රාජකාරිය ඉටුවුණා කියල හිතෙනවා. ඒ විතරක් නෙමෙයි පොඩි නිහතමානී ආඩම්බරකමකුත් හිතෙනවා අපේ රටට කරන්න ලැබුණු සේවය නිසා. 1940 පුරාවිද්‍යා පනත යටතේ 1950 සංශෝදනයේ 15A වගන්තියට අනුව: පුරාවස්තු හොරකම් කිරීම / විනාශ කිරීම දඬුවම් ලැබිය හරි වරදකි. දඬුවම් වශයෙන් වසර දෙකකට නොඅඩු වසර පහට නොවැඩි හිර දඬුවම් හා රුපියල් 50,000 ක දඩ මුදල් ගෙවීමට සිදුවේ. ඒ අතරම මෙය නීතිය ඉදිරියේ ඇප ලබා දිය නොහැකි වරදක් වේ. සංචාරක සටහන ලිවීමේදී පරිශීලනය කල මූලාශ්‍ර: සිරිලක අසු දුටු තැන් – එස් . පි . එස් . වීරසිංහ ශ්‍රී ලංකාවේ හෙළ යුගය – ආචාර්ය සූරිය ගුණසේකර හෙළ ජනප්‍රවාද A comprehensive history of Sri Lanka – Nath Yogasundaram A short history of Ceylon – H.W Corington Pre & Prohistoric Settlement in Sri Lanka – Dr S.U Deraniyagala Archelogical Act of Department of Archaeology ජය වේවා!