• ඔබගේ පාසටහන් පමණක් ඉතිරි කරන්න. ඔබ සමග ගෙනයන අන් සියල්ල ආපසු රැගෙන එන්න

• මත්ද්‍රව්‍ය පානය නොකරන්න

• ඛීමට වතුර සහ ආහාර ද්‍රව්‍ය රැුගෙන යන්න

පිදුම, සංචාරයට රුචි ඔබ සැමට.

කීප සැරයක්ම රිවස්ටන් යනකොට එතැනට පේන අලියෙක් වගේ කන්ද ගැන අපි නිතරම කතා වුනා. මේ තමයි රිවස්ටන් යනකොට මානින්ගල පේන හැටි. ඔය පේන කන්දෙ දකුණූ පැත්තෙ අයිනෙන් තමා උඩට නගින්න ඕන. කලූවට පේන ටික ඔක්කොම කලූගල.

ඔන්න ඉතින් අපි ගමනට ලෑස්ති වුනා. අපි පස් දෙනයි. යතුරු පැදි තුනයි. අපි හැමෝටම කන්ද හීනෙනුත් පේනවා. උදේ කෑම-දවල් කෑම-වතුර අපි අරගෙන ගියා. උදෑසන සීතල විදගන්න හිතාගෙනම අපි පාන්දරින්ම පිටත් වුනා. උදේ හයට මාතලෙන්.රත්තොට පහු වෙනකොටම සීතල තදින්ම දැනුනා. ඒත් ඉතින් අපි නැවතුනේ නෑ. දිගටම ගියා.මේ පාලම ළඟට එනකොට සීතල මදිවට හොදටම බඩගිනියි. ඉතින් හදාගෙන ගිය නූඞ්ල්ස් මෙතන ඉදගෙනම කන්න වුනා.

මාර්ගෝපදේශකයන් ගමේ සිටින බව දැන සිටි නමුත් අප තනිව යෑමට තීරණය කළ බැවින් මගදී හමුවන කෝවිලට ගොස් පෙර සිරිතට පඩුරක් බැද ගන්න අපි අමතක කලෙත් නෑ. (ඇත්තටම අපිට එක තැනකවත් වැරදුනෙත් නෑ.*)

රිවස්ටන් වල නවතින්නෙ නැතුව ඒ පාර දිගේම ඉදිරියටම ගියා. පිටවල පතන පහු කරන කොට යන්න තියෙන්නෙ මේ තුරු වියන යටින්. බලන්න පරිසරය මොන තරම් ලස්සනද කියල.

දිගටම යනකොට හමු වෙන රත්කන්ද හන්දිය. එතනින් රත්කන්ද පැත්තටයි යන්න ඕන. එහෙම යනකොට ගැමි සුවද නොමැකුන ගමක් හමු වෙනව. ඒ පාර දිගේම යනකොට පාර නම් ඒ තරම්ම හොද නම් නෑ.

මේ ගමේදි මගේ පර්ස් එක වැටුනා. ඒ ගැනත් නොකියාම බෑ. ඒත් පංති යන නංගි කෙනෙක් ඒක කිසිම අඩු පාඩුවක් නැතුව අතටම ගෙනත් දුන්න. ඒ තමයි ඒ ගමේ තිබුණු මනුස්සකම. ස්තූති කරන්න වචන මදි වුනා.

මේ ගමේදි අපිට මානින්ගල අපූරුවට පෙනුනා. මානින්ගල කියන නම හැදුනෙ ඉස්සර කාලෙ වෙලාව හොයා ගන්න මේ ගලෙන් වැටුන හෙවනැල්ල භාවිත කල නිසාලූ. මේ පිංතූරෙන් පේන විධිය දකිනකොට ඒක ඇත්ත වෙන්න ඇති කියල අපිටත් හිතුන.

අපි යතුරුපැදි ටික කඩයක් ළඟින් තියල අන්තිම ටික පයින් ගියා. එතකොට හමුවෙන තෙල්ගමු ඔයට උඩින් තියෙන පාලමෙන් තමයි යන්න ඕන.

හැමතැනකම වගේ වැටවල් දාල තියෙන්නෙ හරක්ට මෙතනින් යන්න බැරි වෙන්නයි. ගැමි සුවද හැම තැනම ඉතිරිලා-පැතිරිලා.

මෙතනින් තමයි කැලේට ඇතුල් වෙන්නෙ.

මේ හරක් ගාලක්.

ඔන්න පේනවා මානිගල.

මේ වගේ දිගටම තියෙන අඩි පාර දිගේ කන්ද පැත්තට නැගගෙන යන්න  ඕන. කන්ද උඩට යනකොට ආනතිය වැඩි වෙනව. මේ දවස් වල මෙහෙම වේලිලා තිබුනට වැහි කාලෙට නම් කූඩැල්ලන් පිරුනු තැනක්ලූ. අනික මේ දවස් වල හුළඟත් නැති තරම්.

මේ කන්ද උඩ තියෙන්නෙ නිම්නයක්. ඇති සෙල්ලම් කරන්න පුළුවන්. අපි මෙතන නතර වුනේ නෑ. නිම්නය පහු කරගෙන ගිහින් ඊළඟ කදු මුදුනටත් ගියා. කැලේ මැදින් තමයි යන්නෙ. හුඟක් දුරයි. උඩටම ගියහම නකල්ස් වලින් වැඩි හරියක් පේනවා.

මේ තමයි අපි පහු කරගෙන ආපු නිම්නය.

මේකත් ලෝකාන්තයක් තමයි.

දාල යන්න බෑ කියල හිතුනත් ඉතින් යන්නම  ඕන නිසා අපි මෙතනින් පිටත් වුනා.  අපි තෙල්ගමු ඔයට ගිහින් නාල තමයි ආවෙ. ඒ විස්තර පස්සෙ කියන්නම්.

ආයු බෝ වේවා!