කොළඹ දියඇලි සොයා ගියෙමු

• බිමට ජලය රැගෙන යාමත් කුඩයක් වැනි අව් වැසි ආවරණයක් රැගෙන යාමත් වැදගත් විය හැක.

• මෙම දිය ඇලි සියල්ලටම වගේ ළඟාවීමේ මාර්ග වැටි ඇත්තේ පුද්ගලික ඉඩම් හරහා බැවින් ඔවුන්ට කරදරකාරී වන අයුරින් ඝෝෂා කිරීම, ඔවුන්ගේ දේපල වලට හානිකිරිම නොකළ යුතුය

• ස්නානය කිරිම සඳහා හැකිතාක් ඒ සඳහා භාවිතා කරන තැන් යොදා ගන්න. මේ දිය ඇලි කීපයකම දියේ ගිලි මියගිය ගණන පහ හයකට වැඩි බව සඳහන්වේ.

• බීමත්ව දියට බැසීම මරණයට අතවැනිමකි.

පිදුම, සංචාරයට රුචි ඔබ සැමට.

කොළඹ ජිවත් වන අප කොළඹ දිස්ත්‍රික්කය ගැන දන්නේ මොනවද? ලංකාවේ දිය ඇලි ගැන කියවීමේදී අපට දක්නට ලැබුනේ කොළඹ දිස්ත්‍රික්කයේ ද දිය ඇලි 4 ක් ඇති බවය. මම ත් මගේ මිතුරත් කතිකා කරගත්තේ මෙම කොළඹ දිස්ත්‍රික්කයේ ඇති දිය ඇලි ගැන සොයා යාමටයි. මේ සදහා අප සතියේ දිනයක් තොර ගත්තේ සතිඅන්තයේ කොළඹ නැරඹිය හැකි සැම තැනකම වගේ ජනාකීර්ණ වන බැවින් අපගේ කාර්යය නිසි අයුරින් කළනොහැකි වන නිසාය.

මසක් පමණ වැසි වැටීමෙන් ඇළ -දොළ, ගංගා පිරී ඇති සැප්තැම්බර් මාසයේ දිය ඇලි වල වතුර පිරී ඇතැයි අපි අපේක්ෂා කළෙමු.

අපි දෙදෙනා යතුරු පැදියෙන් උදයේ 8.30 පමණ ගමන පිටත් වුණෙමු. කොළඹම සිටින අපට මෙම දිය ඇලි වලට වැඩි ඈතක නොවන නිසා අප මේ ගමන සදහා රැගෙන ගියේ ස්නානය සඳහා අවශ්‍ය ඇඳුම් සහ වතුර බෝතලයක් පමණි.

මෙම දිය ඇලි සඳහා ළගාවිය හැකි මාර්ග 2 කි.

එනම්,

1. කොළඹ සිට කොට්ටාව හරහා පුවක්පිටියට ගොස් තුම්මෝදර මාර්ගය.
2. කොළඹ සිට කොට්ටාව හරහා පාදුක්කට ගොස් එතනින් බෝපේ මාර්ගය.

අපි මෙම මාර්ග අතරින් අපට වඩාත් පහසු දෙවන මාර්ගය වන පාදුක්ක මාර්ගය තෝරා ගතිමු.

මෙම මාර්ගයේ සිතියමක් පහතින් දක්වා තිබේ.

View Waterfalls in colombo in a larger map

http://goo.gl/maps/KBKOC

උදැසන 8:30 පමණ ගෙදරින් පිටත්වූ අප දම්බොර ග්‍රාමයට ළඟා වනවිට පෙරවරු 9:15 පමණ වී තිබිණ. පාදුක්කේ සිට දම්බොර ඇල්ල දක්වා මුළු දුර කිලෝමීටර 12 ක් පමණ වේ. දම්බොර වැසියන්ගෙන් අප එම දිය ඇල්ල ගැන විමසු මුත් ඔවුන් බොහෝ දෙනෙක් ඒ ගැන දන්නේ නැත. දම්බොර විහාරස්ථාන අසලින් විමසු විට එහි සිටි පුද්ගලයෙකු පැවසුවේ දිය ඇල්ලක් නොදන්නා නමුත් දොළපාරක්‌ නම් ඉදිරියේ ඇති බවය. ඒ අනුව සොයා යන විට එම දොළපාරත් දම්බොර අල්ලේ ඉහළ කොටසත් අපට හමුවිය.

දම්බොර අල්ලේ ඉහළ කොටස.

මෙම අල්ලේ පහළ කොටසේ හඬ අපිට ළඟ ළගම ඇසෙන නමුත් පහළට ළඟා වියහැකි මාර්ගයක් නොදිටිමු. මෙනිසා අකැමැත්තෙන් වූවත් පහළ කොටස නැරඹීමේ අවශ්‍යතාව අත හැර දැමුවේ තවත් දිය ඇලි කීපයක් නැරඹීමට ඇති නිසාය.

ඉන්පසු අප එම මාර්ගයේම තවත් කිලෝමීටරයක් පමණ ඉදිරියට යනවිට කලුඅග්ගල – ලබුගම මාර්ගයට ප්‍රවිෂ්ට වන අතර, එහිදී වම් පසට දිවෙන මාර්ගයේ තවත් කිලෝමීටරයක් පමණ යනවිට තුම්මෝදර මංසන්දිය හමුවේ. මෙම මංසන්දියෙන් පුවක්පිටිය මාර්ගයේ කිලෝමීටරයක් පමණ යනවිට දෙවන දිය ඇල්ල වන රන්මුදු ඇල්ල හමුවේ. මෙයද ඉතා අලංකාර දිය ඇල්ලකි.

රන්මුදු අල්ලේ ඉහළ කොටස

රන්මුදු අල්ලේ පහළ කොටස.

රන්මුදු ඇල්ලේ මැද කොටස පහළ සිට බැලුවිට මෙලෙස දිස් වේ.

අල්ලේ පහළ කොටසේ ස්නානය සඳහා යොදාගන්නා ස්ථානයක්

අල්ලේ පහළ කොටස.

අක්‍රමවත් ලෙස බැහැරකර ඇති කුණු කසල. අල්ලේ පහළ කොටසේ සැම තැනකම වගේ මේවා දක්නට ලැබේ. තද වැසි කාලයේදී මේවා ගංගාවට එකතු වනු ඇත. අප මේ විනාශ කරන්නේ අනාගත දරුවන්ගේ උරුමයයි.

මෙය නැරඹීමෙන් පසුව අපි නැවතත් පුවක්පිටිය තුම්මෝදර ප්‍රධාන මාර්ගයට පිවිසියෙමු. මෙම ගම තවමත් නාගරිකරණය නොවූ සුන්දර ගමකි. මෙහිදී පිරිසිඳු වතුර, කෙත්වතු සහ වාතාශ්‍රය නොඅඩුව ඔබට විඳගන්නට හැකියාව ඇත. ප්‍රධාන මාර්ගයේ ඇති කුඩා තේ කඩයෙන් වස විස නැතිව හැදුනු කෙසෙල් ගෙඩියක් කා හකුරු සමග තේ කෝපයක් පානය කළ අප එම මාර්ගය ඔස්සේ තවත් ඉදිරියට ගමන් කෙරුවේ මීළග දියඇල්ල වන ඇල්ල උඩ ඇල්ල දැක ගැනිමටය. මේ සඳහා එම මාර්ගයේම තවත් කිලෝමීටර 2ක් පමණ යා යුතුය. මෙවිට ඉළුක්ඕවිට කණිෂ්ට විද්‍යාලය හමුවේ. පාසලට පෙර දකුණු පසට ඇති මාර්ගයේ කිලෝමීටර 1.5 පමණ ගිය තැන මෙම ඇල්ල සඳහා ප්‍රවේශ වන මාර්ගය හමුවේ.

ඇල්ල උඩ ඇල්ලේ ඉහළ ඇල්ල

මෙම ඇල්ලට මෙම නම ලැබී ඇත්තේ මෙය කොටස් දෙකකින් යුතු නිසා විය හැක. මෙහි බහුලව මත්ස්‍යයන් දැකගත හැකිය.

ඇල්ල උඩ ඇල්ලේ පහළ ඇල්ල. මෙය ඉතා දර්ශනීය ස්ථානයකි.

ඇල්ල උඩ ඇල්ලේ පහළ ඇල්ල. මෙය ඉතා දර්ශනීය ස්ථානයකි.

වතුර වැටිමෙන් දිය සෙවල බැඳී ඇති ගල් මත යාමේදී ලිස්සිමෙන් වැළකීමට අධාරකයක් (දෙපස ඇති ගස් හෝ උණ පඳුරු) අල්ලා ගත යුතුය.

ඇල්ලේ මෙම කොටසට පැමිණීම සඳහා ඇළ හරහා දකුණුපස ඇති රබර්වත්ත හරහා යා යුතුය. මේවා පුද්ගලික ඉඩම් නිසා ඒවාට හානි නොවන අයුරින් ගමන් කළ යුතුය.

මෙහි දිස්වන්නේ දියෙන් මතුවූ රත්න මාණික්ඛ්‍යයක් නොවේ. සංචාරකයන් විසින් විසි කරන ලද බියර් ටින් එකකි. මේවා මෙලෙස අක්‍රමවත් ලෙස දමා යාමෙන් පරිසරය අවලස්සන වෙනවා මෙන්ම විවිධ සෞඛ්‍ය තර්ජන ද ඇතිවේ.

ඇල්ල උඩ ඇල්ලේ සුපිරිසිඳු දිය දහරාව. කොළඹ දිස්ත්‍රික්කයේ මෙවැනි දිය දහරාවක් දක්නට ලැබීම කොළඹ අපට වාසනාවකි. මේවා රැකගැනීම අපගේ යුතුකමකි.

මෙම ස්ථානයෙන් නික්ම නැවතත් ප්‍රධාන මාර්ගයට ප්‍රවිෂ්ට වුයේ අප නැරඹීමට බලාපොරොත්තුවන මීලග ඇල්ල වන කුමාරි වළ ඇල්ල වෙත ගමන් කිරිමටයි. පුවක්පිටිය තුම්මෝදර මාර්ගයේ පුවක්පිටිය දෙසට තවත් කිලෝමීටර 3 පමණ යනවිට අපට මාර්ගයේ දකුණු පසින් හේවාහින්න මාර්ගය හමුවිය. මෙම අතුරු මාර්ගය නඩත්තු නොකිරීම නිසා ගල් මතුවී ඇතත් කුඩා වාහනයක වුවත් ප්‍රවේසමෙන් යා හැක. මෙම මාර්ගයේ කිලෝමීටර භාගයක් පමණ යනවිට කුමාරි වළ ඇල්ල සඳහා ප්‍රවේශ මාර්ගය හමුවේ.

කුමාරි වළ ඇල්ල සුන්දර මෙන්ම තරමක් අනතුරුදායකය. වතුර වැඩිපුර ඇති අවස්ථාවල නැරඹීමේදී ආරක්ෂාකාරී විය යුතුය.

ඇල්ලේ ඉහළ කොටස. මෙය පොකුණක ආකාරයට සකස්වී ඇත.

වතුර වැටීමෙන් කළුගල ඛාදනය වී ඇති අයුරු. අධික වැසි කාලයේ දී මෙම වළවල් වතුරින් වැසි යන අතර නොදැනුවත්ව ම මේවාට වැටීමේන් අනතුරු වලට භාජනය වේ.

තවත් එවැනි ඛාදනය වී ඇති ස්ථානයක් වතුරින් පිරි ඇති අයුරු.

ඇල්ලට පහළින් ඇති ජල තටාකය. බොහෝ දෙනා ස්නානය සඳහා මෙය භාවිතා කරනු ලැබුව ද මේය තරමක් ගැඹුරින් යුක්තය බව පෙනී යයි.

දිය අල්ලේ ජලය පහළට ගලාබසිනා ආකාරය මනස්කාන්ත දර්ශනයක් මවාලයි.

ඇල්ල නැරඹීම සඳහා පැමිණි සංචාරකයන් විසින් එකතුකර දමා ගිය ප්ලාස්ටික් බෝතල් සහ ටින් කැබලි. මේවා තද වතුර පහරක් පැමිණිවිට නැවත ජලයට එකතුවනු ඇත.

මිහිමඬලට ජීවය ලබා දෙන මෙවැනි ස්ථාන නැරඹීමේදී අප විසින් පරිභෝජනය කරණු ලබන අහාර වල දවටන, ප්ලාස්ටික් බෝතල් වැනි දේවල් නැවත රැගෙන ඒමට මතක තබා ගත යුතුය. මෙලෙස පුරුදුවීමෙන් අපගේ මාතෘ භුමිය අලංකාර තැනක්‌ කිරීමට අපටද යම් තරමක හෝ දායකත්වයක් ලබාදිය හැක. එය ඔබගේ මගේ මෙන්ම මතු පරපුරේද ජිවය සුරක්ෂිත කරනු ඇත. ‌

ඔබ සැමට අප දේශයේ සුන්දරත්වය විඳීමට ලැබේවා!